’سپائڈر مین‘ کے نئے ٹریلر میں لیونل میسی کی انٹری، معاملہ کیا ہے؟

فٹبال کے عالمی سپر سٹار لیونل میسی اس بار مارول کی دنیا سے جڑ گئے ہیں جہاں وہ آنے والی فلم ’سپائیڈر مین: برینڈ نیو ڈے‘ کی ایک پروموشنل ویڈیو میں سپائیڈر مین کے ساتھ نظر آئے ہیں۔

ویڈیو سامنے آنے کے بعد سوشل میڈیا پر مداح حیران رہ گئے اور کئی صارفین نے سوال اٹھایا کہ کیا میسی اب مارول سنیماٹک یونیورس کا حصہ بننے جا رہے ہیں؟

ویڈیو میں لیونل میسی نیویارک کے ایک کیفے میں پہنچتے ہیں، جہاں ان کی ملاقات پیٹر پارکر سے ہوتی ہے۔

ابتدا میں پارکر ایک عام نوجوان کے طور پر نظر آتے ہیں اور دونوں کے درمیان سپائیڈر مین سے متعلق مختصر گفتگو ہوتی ہے۔ چند ہی لمحوں بعد پیٹر پارکر اپنی اصل شناخت ظاہر کرتے ہوئے سپائیڈر مین کا روپ دھار لیتے ہیں۔

اس کے بعد وہ میسی کو نیویارک کی فلک بوس عمارتوں کے درمیان جالوں کے سہارے فضائی سفر کراتے ہیں، جہاں دونوں کئی سنسنی خیز مناظر میں ایک ساتھ دکھائی دیتے ہیں۔

ویڈیو کے وائرل ہونے کے بعد سوشل میڈیا پر مداحوں نے دلچسپ تبصرے کیے۔

بعض  صارفین نے لکھا کہ ’دو گوٹ‘ ایک ہی فریم میں آ گئے جبکہ کئی صارفین نے مزاحیہ انداز میں کہا کہ ’اگر سپائیڈر مین کو کسی کی مدد چاہیے تو میسی سے بہتر ساتھی کوئی نہیں۔‘

کچھ مداحوں نے تو یہاں تک خواہش ظاہر کی کہ میسی کو مستقبل میں کسی مارول فلم میں مختصر کردار دیا جائے۔

انٹرٹینمنٹ ویب سائٹ کامک بیسکس کے مطابق یہ ویڈیو فلم کی پروموشنل مہم کا حصہ ہے۔ اگرچہ لیونل میسی فلم کی کاسٹ میں شامل نہیں ہیں، تاہم ان کی موجودگی نے فلم کی تشہیری مہم کو ضرور نئی جان بخش دی ہے۔

فلم ’سپائیڈر مین: برینڈ نیو ڈے‘، ’سپائیڈر مین: نو وے ہوم‘ کے بعد کی کہانی بیان کرے گی، جہاں پیٹر پارکر ایک ایسی دنیا میں زندگی گزار رہا ہے جس میں ڈاکٹر سٹرینج کے جادو کے باعث کوئی بھی اس کی اصل شناخت نہیں جانتا۔ 

وہ نیویارک شہر کی حفاظت جاری رکھتا ہے مگر اس بار اسے ایک نئے اور طاقتور دشمن کا سامنا ہوگا، جبکہ اس کی صلاحیتوں میں بھی اہم تبدیلیاں دکھائی جائیں گی۔

فلم کی ہدایت کاری ڈیسٹن ڈینیئل کریٹن نے کی ہے، جبکہ ٹام ہالینڈ ایک بار پھر سپائیڈر مین کے کردار میں نظر آئیں گے۔ 

کاسٹ میں زینڈایا، جیکب بیٹالون، سیڈی سنک، جان برنتھل اور مارک رفالو بھی شامل ہیں۔

’سپائیڈر مین: برینڈ نیو ڈے‘ 31 جولائی کو سینما گھروں میں ریلیز ہوگی، تاہم ریلیز سے پہلے ہی لیونل میسی اور سپائیڈر مین کی یہ غیرمتوقع جوڑی دنیا بھر میں سوشل میڈیا پر موضوعِ بحث بن چکی ہے۔