پاکستانی ٹیم 2027 میں پانچ ون ڈے میچز کی سیریز کے لیے انگلینڈ جائے گی

پاکستان کرکٹ بورڈ (پی سی بی) نے اعلان کیا ہے کہ قومی کرکٹ ٹیم مئی 2027 میں پانچ ایک روزہ بین الاقوامی (ون ڈے) میچوں کی سیریز کے لیے انگلینڈ کا دورہ کرے گی۔

پی سی بی کی جانب سے جمعرات کو جاری بیان کے مطابق سیریز کا آغاز 15 مئی 2027 کو ساؤتھمپٹن میں ہو گا جبکہ آخری ون ڈے 26 مئی کو کارڈف میں کھیلا جائے گا۔ 

سیریز  کا دوسرا میچ 19 مئی کو مانچسٹر، تیسرا 21 مئی کو لیڈز اور چوتھا 23 مئی کو چیسٹر لی اسٹریٹ میں ہوگا۔

بیان میں کہا گیا ہے کہ یہ پانچ میچوں کی سیریز دونوں ٹیموں کے لیے آئی سی سی مینز کرکٹ ورلڈ کپ 2027 کی تیاری کا اہم موقع ہوگی۔ 
ورلڈ کپ آئندہ سال اکتوبر اور نومبر میں جنوبی افریقہ، زمبابوے اور نمیبیا کی مشترکہ میزبانی میں کھیلا جائے گا۔

قومی ٹیم اس وقت ویسٹ انڈیز میں دو ٹیسٹ میچوں کی سیریز کھیل رہی ہے۔

اس دورے کے بعد پاکستان اگست اور ستمبر میں تین ٹیسٹ میچوں کی سیریز کے لیے انگلینڈ کا بھی دورہ کرے گا، جو 19 اگست سے 13 ستمبر تک شیڈول ہے۔

آئی سی سی کی تازہ ون ڈے رینکنگ میں پاکستان پانچویں جبکہ انگلینڈ ساتویں نمبر پر ہے۔

پاکستان نے آخری مرتبہ 2021 میں ون ڈے سیریز کے لیے انگلینڈ کا دورہ کیا تھا۔ اس تین میچوں کی سیریز میں بابر اعظم 177 رنز کے ساتھ سب سے زیادہ رنز بنانے والے بیٹر رہے تھے، جن میں تیسرے ون ڈے میں 158 رنز کی شاندار اننگز بھی شامل تھی۔