’ریس سیریز‘ میں عامر خان کی اینٹری، چوتھے سیکوئل میں کون کون سے سٹارز شامل ہیں؟

بالی وُڈ فلم انڈسٹری کے سٹار عامر خان، سدھارتھ ملہوترا اور ٹائیگر شروف کا پہلی بار ایک ساتھ فلم ’ریس ری بوٹ‘ میں نظر آ نے کا امکان ہے۔

انڈین میڈیا کے مطابق عامر خان نے ’ریس ری بوٹ‘ کے سکرپٹ میں دلچسپی ظاہر کی ہے اور وہ فلم کی تحریری تیاری کے عمل میں بھی فعال طور پر شامل ہیں۔ فلم کو مقبول ایکشن تھرلر فرنچائز ’ریس‘ کا نیا اور منفرد انداز قرار دیا جا رہا ہے۔

’ریس‘ فرنچائز کی پہلی دو فلموں میں سیف علی خان نے مرکزی کردار ادا کیا تھا، جبکہ تیسری فلم میں سلمان خان نے مرکزی کردار نبھایا تھا۔ پہلی دونوں فلمیں ایکشن، سنسنی اور مضبوط کاسٹ کے باعث خاصی مقبول ہوئی تھیں، جبکہ ’ریس تھری‘ میں کہانی اور انداز کو مختلف سمت دی گئی تھی۔

اب ’ریس ری بوٹ‘ کے لیے مکمل طور پر نئی کاسٹ کے ساتھ اسی فرنچائز کی ایک نئی فلم دوبارہ پیش کرنے کی تیاری کی جا رہی ہے۔ سدھارتھ ملہوترا کا نام کچھ عرصے سے اس منصوبے سے جوڑا جا رہا تھا، جبکہ حالیہ رپورٹس میں ٹائیگر شروف کی شمولیت کی خبریں بھی سامنے آئی ہیں۔

’پنک ولا‘ کے مطابق عامر خان نے فلم کا سکرپٹ پسند کیا ہے اور وہ اسے مزید بہتر بنانے کے لیے مصنفین کے ساتھ مل کر کام کر رہے ہیں۔ رپورٹ کے مطابق عامر خان کا خیال ہے کہ ’ریس ری بوٹ‘ فرنچائز میں ایک بالکل نیا رنگ شامل کر سکتی ہے۔

رپورٹ کے مطابق فلم کو ایسا تھرلر بنانے کی منصوبہ بندی کی جا رہی ہے جو انڈیا میں اس سے پہلے بننے والی فلموں سے بالکل مختلف ہو۔ فلم ساز فرنچائز کو ایک نئی سمت میں لے جانے اور ناظرین کے لیے تازہ تجربہ پیش کرنے کے خواہاں ہیں۔ فلم میں ایک مضبوط کاسٹ شامل ہوگی، تاہم دیگر اداکاروں کے ناموں کا اعلان مناسب وقت پر کیا جائے گا۔

رپورٹس میں کہا گیا ہے کہ عامر خان فلم کی تیاری میں گہری دلچسپی لے رہے ہیں اور حتمی طور پر منصوبے کا حصہ بننے سے قبل سکرپٹ کو اپنی توقعات کے مطابق بنانے پر توجہ دے رہے ہیں۔

’ریس ری بوٹ‘ کی ہدایت کاری وجے کرشنا آچاریہ کے بارے میں بتایا جا رہا ہے، جو اس سے قبل عامر خان کے ساتھ ’دھوم تھری‘ اور ’ٹھگس آف ہندوستان‘ میں کام کر چکے ہیں۔ اگر عامر خان فلم میں شامل ہوتے ہیں تو یہ ایکشن تھرلر کے شعبے میں دونوں کی تیسری مشترکہ فلم ہوگی۔

دوسری جانب ’ٹپس فلمز‘ کے رمیش تورانی نے مبینہ طور پر فلم کی پری پروڈکشن بھی شروع کر دی ہے۔

سدھارتھ ملہوترا، ٹائیگر شروف اور ممکنہ طور پر عامر خان کی شمولیت کے باعث ’ریس ری بوٹ‘ ایکشن تھرلر فلموں کے مداحوں کے لیے متوقع منصوبوں میں شامل ہو گئی ہے۔