امریکی ایوانِ میں ایران جنگ ختم کرنے کے حق میں قرارداد تیسری مرتبہ منظور

امریکی کانگرس کے ایوانِ زیریں (ایوانِ نمائندگان) نے ایران جنگ ختم کرنے کے حق میں تیسری مرتبہ ووٹ دیا ہے۔
ایوانِ نمائندگان نے جنگی اختیارات سے متعلق ایک قرارداد منظور کی ہے، جس کے تحت کانگریس کی منظوری کے بغیر صدر ٹرمپ کی فوجی کارروائی جاری رکھنے کی صلاحیت ختم ہو جائے گی۔
امریکی خبر رساں ایجنسی اے پی کے مطابق ایوانِ نمائندگان نے منگل کی رات یہ قرارداد 220 کے مقابلے میں 204 ووٹوں سے منظور کی۔ 

واضح رہے کہ رواں موسمِ گرما میں اس سے قبل بھی اس قسم کی کوششیں کی گئی تھیں، تاہم اس مرتبہ ریپبلکن پارٹی کے مزید ارکان نے تمام ڈیموکریٹس کے ساتھ مل کر جنگ ختم کرنے کے حق میں ووٹ دیا۔
تاہم اس نوعیت کی سابقہ قراردادوں کی طرح اس قرارداد کو بھی سینیٹ سے منظوری اور صدر ٹرمپ کے دستخط کے بغیر قانون نہیں بنایا جا سکتا اور امکان یہ ہی نظر آرہا ہے کہ وہ اِسے ویٹو کر دیں گے۔
ریاست میساچوسٹس سے تعلق رکھنے والے ڈیموکریٹک پارٹی کے رکنِ سیٹھ مولٹن کا کہنا تھا کہ ’ہمیں یاد ہے جب ڈونلڈ ٹرمپ نے کہا تھا کہ یہ جنگ صرف چند ہفتوں تک جاری رہے گی؟‘
واضح رہے کہ سیٹھ مولٹن عراق جنگ کے دوران امریکی فوج میں خدمات انجام دے چکے ہیں اور انہوں نے اس قرارداد کی منظوری میں اہم کردار ادا کیا ہے۔ 
انہوں نے مزید کہا کہ ’اب وقت آگیا ہے کہ کانگریس آئین کی ہدایات کے مطابق مشکل اور سخت سوالات پوچھے، بجائے اس کے کہ جنگ کی حامی ایک اور انتظامیہ کی اندھی حمایت کی جائے۔‘
اہم بات یہ ہے کہ حکمران ریپبلکن پارٹی کے سات ارکان نے بھی قرارداد کے حق میں ووٹ دیا، ان میں سے تین ارکان نے پہلی مرتبہ اس قرارداد کی حمایت کی۔

امریکہ میں وسط مدتی انتخابات اور ایران جنگ
امکان ہے کہ رواں برس تین نومبر کو ہونے والے امریکی وسط مدتی انتخابات سے قبل ایران جنگ کے حوالے سے ایوانِ نمائندگان میں یہ آخری ووٹنگ ہو۔
امریکہ میں وسط مدتی انتخابات میں ایران کی جنگ ڈیموکریٹس اور ریپبلکنز کی سیاسی انتخابی مہم میں نمایاں طور پر زیرِ بحث ہے۔
صدر ٹرمپ کی جانب سے ایران کے خلاف 28 فروری کو شروع کی گئی جنگ قریباً سات ماہ سے جاری ہے۔ اس دوران وقفے وقفے سے ایک دوسرے پر کیے جانے والے مہلک میزائل حملوں نے خطے میں بڑے پیمانے پر تباہی اور افراتفری پیدا کر رکھی ہے۔
امریکی صدر ڈونلڈ ٹرمپ نے چند روز قبل نومبر میں ہونے والے وسط مدتی انتخابات کے فوراً بعد ایران جنگ ختم ہونے کی پیش گوئی کی تھی۔
 بدھ کو ڈیلس میں ریپبلکن نیشنل کنونشن کے لیے روانگی سے قبل گفتگو کرتے ہوئے کہا کہ ’میرے خیال میں انتخابات کے فوراً بعد ایران جنگ ختم ہو جائے گی کیونکہ وہ اب مزید مقابلہ نہیں کر سکتے۔‘