ٹی20 ورلڈ کپ کے لیے انڈین سکواڈ کا اعلان، خراب کارکردگی پر نائب کپتان شبھمن گِل ڈراپ

انڈین کرکٹ بورڈ (بی سی سی آئی) نے آئندہ برس شیڈول ٹی20 ورلڈ کپ کے لیے 15 رکنی سکواڈ کا اعلان کیا ہے۔

فرانسیسی خبر رساں ایجنسی اے ایف پی کے مطابق سنیچر کو ممبئی میں انڈین کرکٹ بورڈ کے سلیکٹرز نے سکواڈ کا اعلان کرتے ہوئے بتایا کہ ’خراب کارکردگی کے باعث ٹی20 ٹیم کے نائب کپتان شبھمن گِل کو ڈراپ کردیا گیا ہے۔‘

چیف سلیکٹر اجیت اگرکر کے مطابق شبھمن گِل اس وقت خراب فارم سے گزر رہے ہیں۔ وہ کہتے ہیں کہ ’شبھمن گل حالیہ ٹی20 میچز میں اپنی صلاحیت کے مطابق کارکردگی نہیں دکھا سکے، اسی وجہ سے انہیں ورلڈ کپ سکواڈ میں شامل نہیں کیا گیا۔‘

اعداد و شمار کے مطابق ٹی20 ٹیم کے نائب کپتان شبھمن گِل نے اپنے آخری 15 ٹی20 میچز میں صرف 291 رنز بنائے ہیں جو ان کے معیار کے مقابلے میں کم ہیں۔

دوسری جانب سوریا کمار یادیو کو بطور کپتان برقرار رکھا گیا ہے حالانکہ ان کی فارم پر بھی سوالات اٹھ رہے تھے۔ سوریا کمار یادیو گذشتہ 22 اننگز میں نصف سینچری بنانے میں ناکام رہے ہیں مگر اس کے باوجود سلیکٹرز نے ان پر مکمل اعتماد کا اظہار کیا ہے۔ اجیت اگرکر کا کہنا تھا کہ ’ٹیم کو اپنے کپتان پر بھروسہ ہے اور امید ہے کہ وہ ورلڈ کپ میں ٹیم کو بہتر کارکردگی دلائیں گے۔‘

سوریا کمار یادیو نے اپنی خراب فارم کا اعتراف کرتے ہوئے کہا ہے کہ ’یہ مشکل وقت طویل ہو چکا ہے، مگر میں جانتا ہوں کہ اسے کیسے بہتر بنانا ہے، ورلڈ کپ سے پہلے اپنی بیٹنگ پر کام کرنا ہے۔‘

آل راؤنڈر اکشر پٹیل کو ٹیم کا نائب کپتان مقرر کیا گیا ہے جبکہ وکٹ کیپر ایشان کشن کو ڈومیسٹک کرکٹ میں شاندار کارکردگی کی بنیاد پر سکواڈ میں شامل کیا گیا ہے۔ ایشان کشن نے آخری بار سنہ 2023 میں انڈیا کی نمائندگی کی تھی۔

یہی ٹیم نیوزی لینڈ کے خلاف پانچ ٹی20 میچز کی ہوم سیریز بھی کھیلے گی جو ورلڈ کپ سے قبل انڈیا کی آخری بین الاقوامی سیریز ہو گی۔ واضح رہے کہ یہ ورلڈ کپ انڈیا اور سری لنکا کی مشترکہ میزبانی میں منعقد ہو گا جبکہ انڈیا اس کا دفاعی چیمپئن بھی ہے۔

انڈیا کا سکواڈ

انڈیا کے سکواڈ میں سوریا کمار یادیو (کپتان)، ابھشیک شرما، سنجو سیمسن (وکٹ کیپر)، تلک ورما، ہاردک پانڈیا، شیوم دوبے، اکشر پٹیل (نائب کپتان)، رِنکو سنگھ، جسپریت بمراہ، ہرشیت رانا، ارشدِیپ سنگھ، کلدیپ یادو، ورن چکرورتی، واشنگٹن سندر اور ایشان کشن (وکٹ کیپر) شامل ہیں۔