بابر اعظم بگ بیش لیگ چھوڑ کر واپس پاکستان لوٹ گئے

کرکٹ ویب سائٹ ای ایس پی این کرک انفو کے مطابق پاکستان کرکٹ ٹیم کے بیٹر بابر اعظم بگ بیش لیگ  کے فائنلز کے بقیہ مرحلے میں سڈنی سکسز کی نمائندگی نہیں کریں گے۔

سڈنی سکسز نے اعلان کیا ہے کہ بابر کو قومی ٹیم کے کیمپ میں شرکت کے لیے فوری طور پر پاکستان واپس بلایا گیا ہے۔

یہ اعلان جمعرات کو ہوبارٹ ہریکینز کے خلاف چیلنجر فائنل (ایس سی جی میں) سے صرف 24 گھنٹے قبل کیا گیا۔ اس میچ کی فاتح ٹیم اتوار کو پرتھ میں ہونے والے بی بی ایل فائنل میں پرتھ سکورچرز سے مقابلہ کرے گی۔

بابر اعظم ابتدا میں پورے ٹورنامنٹ کے لیے دستیاب تھے اور جنوری کے اوائل میں سری لنکا کے خلاف تین ٹی 20 میچز کی سیریز کے لیے پاکستان ٹیم میں منتخب بھی نہیں کیے گئے تھے۔

پاکستان اور آسٹریلیا کے درمیان تین ٹی 20 میچز کی سیریز 29 جنوری سے شروع ہو رہی ہے۔ تاہم بی بی ایل میں شریک آسٹریلوی کھلاڑی فائنل کے بعد ہی قومی ٹیم کو جوائن کریں گے، جبکہ باقی سکواڈ 24 جنوری کو یو اے ای میں پری ٹور کیمپ کے لیے روانہ ہوگا۔

سڈنی سکسز کے بیان میں کہا گیا کہ ’سڈنی سکسز کو آج آگاہ کیا گیا ہے کہ اوپنر بابر اعظم کو آئندہ بین الاقوامی میچز کی تیاری کے لیے قومی ٹیم کے کیمپ میں شامل ہونا ہے۔ اسی وجہ سے بابر فوری طور پر آسٹریلیا چھوڑ دیں گے اور بی بی ایل 15 کے فائنلز کے بقیہ میچز کے لیے دستیاب نہیں ہوں گے۔‘

سکسز کی جنرل منیجر ریچل ہینز نے تصدیق کی کہ منصوبہ یہی تھا کہ بابر فائنلز سمیت پورا ٹورنامنٹ کھیلیں گے۔

ان کا کہنا تھا 'ہم بابر اعظم کے آسٹریلیا میں قیام کے دوران سڈنی سکسز کی نمائندگی پر ان کے بے حد مشکور ہیں۔ اگرچہ ہماری ابتدائی منصوبہ بندی یہ تھی کہ وہ فائنلز تک دستیاب رہیں گے، مگر ہم بخوبی سمجھتے ہیں کہ پاکستان کے قومی کیمپ کے آغاز کے ساتھ ہی ان کی ترجیحات بدل گئی ہیں۔'

یہ خبر اس انکشاف کے دو دن بعد سامنے آئی جب سکسز کے کپتان موئیسس ہنریکس نے بتایا تھا کہ اس واقعے کے بعد بابر کافی دل برداشتہ تھے جب سٹیون اسمتھ نے تھنڈر کے خلاف میچ میں انہیں ایک رن لینے سے روک دیا تھا۔

ہنریکس نے فاکس کرکٹ سے گفتگو میں کہا' اس بات کو نارمل ہونے میں چند دن لگے۔ دراصل یہ ثقافتی فرق کی ایک غلط فہمی تھی۔ ہمارے ہاں یہ ایک عام بات ہے، مگر بابر اس کے عادی نہیں تھے۔ جب انہیں بات سمجھائی گئی تو سب ٹھیک ہو گیا۔ اب دونوں بڑے کھلاڑی دوبارہ دوستانہ تعلق میں ہیں۔'

انہوں نے مزید بتایا کہ وہ خود اور ہیڈ کوچ گریگ شپرد بابر سے بات کرنے میں پیش پیش تھے 'ہم نے دیکھا کہ وہ واضح طور پر پریشان تھے، اس لیے یہ سمجھنا ضروری تھا کہ انہیں کیوں برا لگا۔ جب مسئلے کی جڑ تک پہنچے تو معاملہ ختم ہو گیا۔'

بابر اعظم نے اپنے پہلے بی بی ایل سیزن میں 11 میچز میں 202 رنز سکور کیے، ان کی اوسط 22.44 رہی جبکہ سٹرائیک ریٹ 103.06 رہا۔ انہوں نے دو نصف سنچریاں بھی سکور کیں۔ بیٹنگ کے اعتبار سے سیزن مشکل ہونے کے باوجود، بابر نے آسٹریلیا میں اپنے تجربے کو مثبت قرار دیا۔

بابر کا کہنا تھا 'سب سے پہلے سڈنی سکسز کا شکریہ، تمام کھلاڑیوں اور کوچز کا بھی۔ میں نے یہاں اپنا وقت بہت انجوائے کیا۔ بدقسمتی سے اب مجھے قومی ڈیوٹی کے لیے واپس جانا ہوگا۔ میں اپنے ساتھ بہت سی مثبت چیزیں لے کر جا رہا ہوں، سیکھنے کا موقع اور یادگار لمحات۔'

بابر نے مزید کہا کہ خاص طور پر سکسز کے شائقین کا شکریہ، ایس سی جی میں جو سپورٹ اور ماحول ملا، وہ لاجواب تھا۔

دوسری جانب، تجربہ کار بلے باز ڈینیئل ہیوز کو چیلنجر فائنل کے لیے سکواڈ میں شامل کر لیا گیا ہے، اور یہ ان کا 100واں بی بی ایل میچ ہوگا۔ ہوبارٹ ہریکینز کے کپتان نیتھن ایلس بھی معمولی ہیم سٹرنگ انجری کے بعد ٹیم میں واپسی کے لیے تیار ہیں، وہ میلبرن سٹارز کے خلاف ناک آؤٹ میچ میں شریک نہیں ہو سکے تھے۔