ٹی20 ورلڈ کپ فائنل: نیوزی لینڈ کا ٹاس جیت کر انڈیا کے خلاف فیلڈنگ کا فیصلہ

ٹی20 ورلڈ کپ کے فائنل میں نیوزی لینڈ نے ٹاس جیت کر انڈیا کے خلاف فیلڈنگ کا فیصلہ کیا ہے۔

احمد آباد کے نریندر مودی سٹیڈیم میں میچ کا آغاز پاکستانی وقت کے مطابق شام ساڑھے چھ بجے ہو گا۔

انڈیا نے انگلینڈ کو جبکہ نیوزی لینڈ نے جنوبی افریقہ کو سیمی فائنلز میں شکست دے کر فائنل میں رسائی حاصل کی تھی۔

انٹرنیشنل کرکٹ کونسل نے (آئی سی سی) نے ٹی20 ورلڈ کپ کے لیے مجموعی طور پر ایک کروڑ 35 لاکھ ڈالرز کا انعامی پول مقرر کر رکھا ہے جو سنہ 2024 کے ٹورنامنٹ کے مقابلے میں 20 فیصد زیادہ ہے۔ فاتح ٹیم کو 30 لاکھ ڈالرز ملیں گے جبکہ فائنل ہارنے والی ٹیم کو 16 لاکھ ڈالر انعام کے طور پر دیے جائیں گے۔

اسی طرح سے سیمی فائنل میں ہارنے والی ٹیموں میں سے ہر ایک کو سات لاکھ 90 ہزار ڈالرز ملیں گے، جبکہ سپر ایٹ مرحلے تک پہنچنے والی ٹیمیں تین لاکھ 80 ہزار ڈالرز وصول کریں گی۔ گروپ مرحلے میں شامل ٹیمیں بھی کم از کم دو لاکھ 50 ہزار ڈالرز کے انعام کی حقدار ہوں گی۔