چیز پراٹھے، سی ڈی 70 اور ٹکسیڈوز، غیرملکی یوٹیوبرز کے کراچی ٹرپ کی انٹرنیٹ پر دھوم
پیر 18 مئی 2026 11:49
سوشل ڈیسک -اردو نیوز
لیوک ڈمانٹ ماضی میں بھی متعدد بار پاکستان کا دورہ کر چکے ہیں اور انہیں اسلام آباد کے کوئٹہ ہوٹل کے چیز پراٹھے خاصے پسند ہیں۔ (فوٹو: کیارن براؤن)
کراچی کی سڑکیں، سیاہ ٹکسیڈوز، شور مچاتی سی ڈی 70 موٹرسائیکلیں، اور بیچ شہر میں قہقہے لگاتے چند غیر ملکی نوجوان۔ سوشل میڈیا پر وائرل ہونے والی اس ویڈیو نے پاکستان کا ایک ایسا رُخ دنیا کو دکھایا جسے دیکھ کر ہزاروں لوگ حیران بھی ہوئے اور خوش بھی۔
مشہور ٹریول کریئیٹرز لیوک ڈمانٹ، ہیری جگارڈ، کیارن براؤن اور راب حال ہی میں کراچی پہنچے جہاں انہوں نے شہر کو بالکل اپنے انداز میں ایکسپلور کیا۔
لیکن یہ کوئی عام ٹریول وی لاگ نہیں تھا۔ چاروں دوست کراچی کی مصروف، دھواں دار اور ہارنوں سے گونجتی سڑکوں پر بلیک ٹائی ٹکسیڈوز پہن کر نکلے۔ کبھی وہ رکشوں کے درمیان چلتے دکھائی دیے، کبھی مقامی لوگوں سے ہاتھ ملاتے، کبھی بچوں کے ساتھ ہنستے اور کبھی سڑک کنارے کھڑے لوگوں سے ہائی فائیو کرتے۔
ویڈیو میں کراچی کی وہی اصل روح نظر آئی، بے ترتیبی بھی، شور بھی لیکن ساتھ ہی ایک عجیب سی زندگی، گرمی اور محبت بھی۔
ویڈیو کے ساتھ انہوں نے لکھا ’یہ آپ کے لیے اشارہ ہے کہ دوستوں کے ساتھ پاکستان کی ٹرپ ضرور کریں۔‘
اور پھر سوشل میڈیا پر ردعمل کا طوفان آ گیا۔
کسی نے لکھا کہ ’لڑکے انڈیا جاتے ہیں، مرد پاکستان آتے ہیں۔‘
کسی نے کہا کہ ’گینگ دوبارہ پاکستان پہنچ گئی‘
ویڈیو میں ایک لمحے پر سی ڈی 70 موٹرسائیکل کی مخصوص آواز سنائی دیتی ہے جس پر بھی لوگوں نے دلچسپ تبصرے کیے۔
ان چاروں میں سب سے زیادہ پہچانا جانے والا نام شاید لیوک ڈمانٹ کا ہے جو اس سے پہلے بھی پاکستان آ چکا ہے اور یہاں کی ویڈیوز کے باعث پاکستانی سوشل میڈیا پر خاصا مشہور ہو چکا ہے۔
لیوک خاص طور پر اسلام آباد کے ایف سیون میں واقع کوئٹہ ہوٹل کے چیز پراٹھے کے بعد وائرل ہوئے تھے۔ انہوں نے اپنی ویڈیو میں پراٹھے کی اتنی تعریف کی کہ پاکستانی صارفین نے انہیں ’چیز پراٹھا گائے‘ کہنا شروع کردیا۔
دلچسپ بات یہ ہے کہ کراچی ٹرپ کے دوران لیوک نے بعد میں فیس بک پر ہسپتال کے بستر سے اپنی تصویر بھی شیئر کی جس میں ان کے ہاتھ پر ڈرپ لگی ہوئی تھی۔ انہوں نے مزاحیہ انداز میں لکھا کہ میں نے بہت زیادہ چیز پراٹھے کھا لیے۔
اس پوسٹ پر بھی پاکستانیوں نے خوب مزاحیہ تبصرے کیے۔
یہ پہلا موقع نہیں کہ غیرملکی کریئیٹرز پاکستان کی تعریف کرتے نظر آئے ہوں۔ برطانوی وی لاگر آئیزاک ایلام، جو اسلام آباد، لاہور اور شمالی علاقوں کا سفر کر چکے ہیں، پاکستان کو اپنے پسندیدہ ممالک میں شمار کر چکے ہیں۔
اسی طرح دنیا کے 55 ممالک گھومنے والی ٹریولر کیٹ وڈلی نے پاکستانی کھانوں کو دنیا کا بہترین کھانا قرار دیا تھا۔
ہیری جگارڈ بھی پاکستانی کھانوں سے خاصا متاثر دکھائی دیتے ہیں۔ اپنی فوڈ سیریز میں وہ نہاری کو 9.6 ریٹنگ دے چکے ہیں جو ان کے مطابق دنیا بھر کے بہترین کھانوں میں سے ایک ہے۔
سوشل میڈیا پر وائرل ہونے والی یہ ویڈیوز شاید صرف چند غیرملکی دوستوں کی پاکستان ٹرپ نہ ہوں بلکہ وہ تصویر بھی ہیں جو پاکستان کے لوگ دنیا کو دکھانا چاہتے ہیں، ایک ایسا ملک جہاں شور بہت ہے، ٹریفک بھی، افراتفری بھی مگر مہمان کے لیے دل ہمیشہ کھلا رہتا ہے۔
