پاکستان کے سٹار بیٹر بابر اعظم کی انگلینڈ کے خلاف پہلے ٹیسٹ میں شرکت تاحال مشکوک ہے اور ٹیم مینجمنٹ کو ان کی فٹنس کے حوالے سے آخری وقت میں فیصلہ کرنا پڑ سکتا ہے۔
کرک انفو کے مطابق بابر اعظم دائیں ہاتھ کی انگلی کی انجری سے صحت یاب ہو رہے ہیں، جس کے باعث پاکستان کرکٹ ٹیم کو پہلے ٹیسٹ کے لیے ان کی دستیابی پر حتمی فیصلہ کرنا ہے۔
مزید پڑھیں
بابر اعظم کو انگلی میں انجری ویسٹ انڈیز کے خلاف دوسرے ٹیسٹ میں بیٹنگ کے دوران ہوئی تھی، جبکہ انگلینڈ کے شہر بیکنہم میں پاکستان کے وارم اپ میچ کے دوران بھی ان کے اسی ہاتھ پر دوبارہ گیند لگی۔
بیکنہم میں پروفیشنل کاؤنٹی کلب سلیکٹ الیون کے خلاف وارم اپ میچ میں گیند لگنے کے بعد بابر اعظم ریٹائرڈ ہرٹ ہوکر میدان سے باہر چلے گئے تھے اور بقیہ میچ میں حصہ نہیں لیا۔ پاکستان کرکٹ بورڈ نے اس اقدام کو ’احتیاطی تدبیر‘ قرار دیا تھا۔
پاکستانی ٹیم اتوار کو لیڈز پہنچی اور تین ٹیسٹ میچز کی سیریز کے آغاز سے دو روز قبل پیر کو ہیڈنگلے میں پریکٹس سیشن کیا، جہاں بابر اعظم نے مختصر وقت کے لیے نیٹس میں بیٹنگ کی۔
اگرچہ بیٹنگ کے دوران بابر اعظم میں تکلیف کی کوئی واضح علامت نظر نہیں آئی، تاہم ان کا نیٹ سیشن مختصر رہا۔
پاکستانی فاسٹ بولر محمد عباس نے کہا ہے کہ بابر اعظم کی شرکت کے حوالے سے میڈیکل پینل اور سلیکشن کمیٹی نے تاحال کوئی فیصلہ نہیں کیا۔
محمد عباس نے میڈیا سے گفتگو کرتے ہوئے کہا، ’وہ کھیلیں گے یا نہیں، اس کا فیصلہ میچ کے روز کیا جائے گا۔ انہوں نے آج چند تھرو ڈاؤنز اور کچھ بیٹنگ پریکٹس کی، لیکن ہمیں طبی مشورے پر عمل کرنا ہوگا۔‘
بابر اعظم کی عدم دستیابی کی صورت میں پاکستان کے مڈل آرڈر میں سعود شکیل اور اویس ظفر دونوں کو شامل کیے جانے کا امکان ہے۔
سعود شکیل ویسٹ انڈیز کے خلاف پاکستان کی ٹیسٹ سیریز میں شامل نہیں تھے، جبکہ اویس ظفر نے دوسرے ٹیسٹ میں ڈیبیو کیا تھا۔
سعود شکیل نے انگلینڈ کے خلاف وارم اپ میچ میں سنچری بھی سکور کی تھی اور ان کی پہلے ٹیسٹ میں شرکت متوقع تھی، تاہم بابر کے نہ کھیلنے کی صورت میں اویس ظفر کے لیے بھی پلیئنگ الیون میں جگہ بن سکتی ہے۔
